Facebook? Blogger? The End of the World?

二零一二年九月廿一日  (星期五)

很多人包括我在內自從用了FACEBOOK之後，就漸漸用少了日記，甚至完全沒有打理。

這個也算伴我成長的地方，自我入理大讀書開始就寫，我真係唔忍心就咁停寫。更何況，FACEBOOK 每日俾人洗版式的更新，有時連最重要的朋友一些近況也忽略了。因此，我一直也沒有放棄用BLOGGER，始終，這裡才是寫文章的地方。

離開了認知培訓中心之後，過了數個月我加入了YMCA，為「創意小公民培育計劃」擔任計劃主任。說起來，這份工作距離合約完結也越來越近。究竟將來的路會怎樣？我暫時沒有太多計劃！因為今日是2012年9月21日，再過3個月就是大家所指的世界末日(2012年12月21日)。很多人指，那天地球將會與銀河系對齊，成一直線，銀河系中心的物質將會直接衝擊地球，對地球上所有生物都有好大影響。我不覺得那天就是末日，但我的確感到有種轉變快將到來。或者人類的進化要到了！

睇睇下！發現原來自己好耐沒有更新KTV，熟悉我的朋友都知我有整KTV的習慣。好啦！又係時候同大家分享一下二次創作！如果~~~你好耐沒聽新歌，以下我選的十二首就值得聽一下！

如果你想唱，請將音量改純左聲道 或 純右聲道啦！音量旁邊有個制可以轉全螢幕的！

因版權限制，以下提供的KTV，只作網絡測試之用，並不提供下載，敬請留意。

排名以我家中點播率作準！絕對主觀！^^

01. 關心妍 - 失戀哲理
02. 陳曉琪 - 別有用心
03. 蔡卓妍 - 白頭到老
04. 林欣彤 - 樹藤
05. 鍾嘉欣 - 最幸福的事
06. 容祖兒 - 出色
07. 吳雨霏 - 告白
08. 林欣彤 + 容祖兒 - 追風箏的風箏
09. Hotcha - Hot Lady
10. 張敬軒 - 紅
11. 鄭融 - 第五類
12. 鄭融 - 漸漸

給香港人的一封信

給香港人的一封信

最近我腦海有個想法：「我有我做(工作)！你有你加(物價)！」究竟想點呀？

今日報章的標題是反映貧富懸殊情況的堅尼系數又升啦！

2006年0.533, 2011年0.537. 感覺好似只是升左小小，但實際上所有中下階層的人都感受到香港近年來物價飆升的問題好嚴重。

作為草根階層，月薪無多大調整；只有政府和商家的小恩小惠，大財團一年加價兩三次，港鐵搞個只限星期一至五的十送一優惠，薪金一年也未必加一次，即使加薪，也被通脹抵消了。

現在，我迫不得已都唔會去麥當勞和大XX等快餐店。一個套餐收你27蚊，大XX仲過份，收差不多$38-39，就快衝破$40。食個LUNCH無40都行唔到出門口；相比2006年，當時一個套餐平均$19-23，大XX都係$32左右。

如果淨係午膳，我慳儉返公司帶飯食都可以，之但係車費都加到癲了。港鐵17/6實施加價之後，由我家過海返公司八達通一程就要$12.5，返工來回就$25！簡直癡左線！一個麥當勞餐都快買到！佢地年年加價一點，博大霧無人知。但大家應該好清楚，現在「衣、食、住、行」有邊一樣唔係不停加價？

小數怕長計！錢就一年比一年唔見駛！最戇居既竟然係，你一直努力死慳死抵，對方就一直不遺餘力地揸乾揸盡！香港是以人為本的社會嗎？不是！我認為這根本是以錢為本的社會，有錢有面子、有房子、有妻子、有車子、有兒子！有錢可以放假，可以養病！無錢？病也是奢侈的！

乜大家覺得一星期返足44-60小時，每個月出份糧僅夠糊口、勉強租樓、積蓄都儲唔到既生活是人過的嗎？手停就口停的日子有保障嗎？先不談強「姦」金的成效有多少，話唔埋到你退休個時，食個麥記已經誠惠$50-$60。你辛苦儲落的幾十年積蓄都唔夠你兩、三年用。到時候，你就真係「臨老唔過得世！」

連自己都保障唔到，所以唔好話香港人出生率低，仲有邊個敢生仔呀？生左都養唔起啦！一係效法日本，人人養小狗，寵物當仔養。唔生仔，咁結婚好唔好？真係SORRY，結婚由婚紗開始樣樣都要錢，加埋最平都要20-25萬起，好多人仲要認為一生人先得一次，於是要盡量豪爽、盡量舖張。結果埋單一計30萬走不掉。這個價錢已經是買樓的首期耶！怎可能用首期的錢結婚，然後再儲首期的錢買樓呢？難道俾左首期就唔駛供樓咩？而且一供就二、三十年。人生有多少個二、三十年？

結婚後不生育還好！一生育就表示要供樓外還要供書教學，膊頭有的不是骨頭，而是磚頭和人頭！人做到病都不能退！份工一定唔可以失去！老闆就看穿你周身責任走唔甩，無償加工，一人做幾分工！所以，唔好責備年青人份份工做唔長係短視，不成熟的表現！至少他還有本錢選擇一份喜歡的工作；相反，可憐的是想走不得，周身責任的成年人。做了「三公」(供樓、供書教學、供養父母)，分分鐘供足一世都唔完，你還有多餘的錢可以享受人生嗎？到時退休後無收入，靠強「姦」金過活！生活分分鐘要折墮過現在。

所以，我認為「香港是搵錢既地方，唔係生活既地方」！

人生為咩？短短七十至八十年壽命為咩？如果只是做金錢的奴隸就花掉一生，值得嗎？我看通透了，結婚不是必需、生兒育女都不是必需、買樓不是必需，也明白到自己生活是有更重要的意義，人除了工作以外也要享受大自然，要懂得善用時間，善待自己、家人、朋友和重視的人。更要懂得珍惜身邊出現的人和事，好好保護得來不易的社會和地球。社會是由人所組成的，如果連我們都不將自己當成一個人，那這個也不是一個社會！如果現代化和都市化必然帶來這種問題，那社會的發展也好應該要改變一下，甚至革新！

我謹代表我自己，並不代表香港人立場