給一位不簡單的人的留言

回想起來，當初叫你開番個日記寫下自己難忘的事，你的態度是不太理會。

慢慢地，日記內容聚沙成塔！現在都有九個月了，你有冇重看自己的日記？

其實我一直有重看自己日記的習慣，每當看見自己寫到連雞毛蒜皮的小事都包括在內，與你相比真是複雜得多！你就是這麼簡單的一個人

『我們現在看重的，長大後會覺得不切實際』

想的也是，看過別人的日記，總會覺得大家年青人都共同面對著好多煩惱、挑戰、衝擊，甚至生離死別。我不斷詳細地寫，就是希望讓自己長大後可以對以前的事有仔細的重溫，甚至回顧一些白癡無聊的回憶時都可以大笑一頓。

但每當聽到你說又長，又悶，背景又不討好！我真是百般滋味在心頭。

我由頭到尾看了一次你的日記，你令我回憶起好多大家之間開心和傷心的事。

我好開心你說我的每一次，因為你令我覺得你仍然會重視和關心身邊的人。

我並沒有小看你，因為我知你根本就是一位好聰明，醒目的人。但請原諒我過去對你的緊張，或許真是太過看不過眼，竟用了太認真甚至出言中傷的話迫你面對現實！希望你明白我苦心。

『人生本是一場計劃，成功與否在乎你選擇怎樣面對』

你日記的每一隻字都給我知道你不斷成長，雖然你偶爾會方寸大亂，但好快又會安頓下來。你的說話太少，從對話中認識你是不可能的！你有好多心事不與人分享，只會不斷的收起來！我知道曾幾何時你會坦誠向我說，可是，現在的你只會更保護自己，因為我曾經傷害你。

雖然如此，但你仍是我這生人中最不可少的知己，你每天(尤其是早上)對我的支持是好重要的！

我願意犧牲寶貴的休息時間寫這篇你可能一生也不會看的日記，希望當你讀完會有另一番的體會！

給我重視的知己。

一位簡單的人上！

回憶是快樂的

只要一直留意我日記的都知我之前幫朋友拍片，由於佢在電影公司工作，故此星期六晚既金像獎頒獎禮我和男主角都有行內的門票出席。不過可惜當晚佢要到後台拍攝，只得我和男主角坐觀眾席。我地坐得好前，在台的左前方，而嘉賓席和舞台就在自己的面前，感覺非常捧！


可以親眼見到劉德華、吳彥祖、周迅、黃秋生、曾志偉、余文樂、周杰倫、劉嘉玲、王苑之，好正呀！

星期二晚同Serene講左陣電話，佢問我讀完之後如果無大學收我會點？我當時答她，梗係出來做野啦！不過又或者再報多次演藝學院！回想起來，自己真是一位對社工和舞台都好有興趣的人，自小幫人，朋友成日話我好有資格做社工，在中學的七年裡，陪我長大的都是禮堂的舞台，特別是中四和中六的兩年，令我學會了更多的燈光和舞台管理，試過在老師病了的情況下帶著三十位同學(戲劇校隊)出外參加校際賽！成班同學中五級以下，得自己一個中六生，當時我真係好緊張，在出賽前一刻班同學仔仲要在化妝間非常唔聽話，結果嚇到我喊佢地先識乖！

長大了自己選擇了正規的大學生涯！但可惜太喜愛舞台而忽略了學業，結果大學生做不成讀了副學士！浮浮沉沉快近三年。之前報過演藝學院結果自己唔爭氣(燈光面試遲到、舞管面試的數學部份和創作部份表現不好)，如果再有機會，我都會選擇再報演藝！難道上天要我走回頭路？真是天意弄人！

忙中偷閒 之 今日天堂聽日地獄

又有數個星期無寫日記啦！呢排既工作真係好多，開會、簡報會、論文、實習，多到嚇死人。其實身邊個個朋友同學都係咁忙，難度我地依家要鬥多野做咩？可以鬥另一啲嗎？

為了今天一早的簡報會，昨晚花了數十小時去準備。最大件事係我星期六和星期日花了太多精神在其他事上，星期一的中期測驗令我星期日晚瞓得兩粒鐘！今天的簡報會又令我昨天在學校留到夜晚十一點先走！返到屋企仲要做到天光五點！瞓左兩粒鐘又要起身返學校為簡報會作綵排。

點知出門口之際居然收到同學電話話阿Sir腸胃炎，又痾又瀉又嘔！今日唔駛返，順延下星期二簡報！聽罷即時噴火！雖則未出門口，仲可以上床休息，但準備好晒，臨門撻Q！佢玩死我啦！連續兩日唔夠休息，搞到個人好燥呀。有時真係想快手啲做晒所有野休息一下，但次次都是一波未停，一波又起。之後一睡就睡到下午五時左右！真係誇張，好似昏迷左咁！起身時個頭仲要比上床前痛呀！阿媽聽我把聲話作病！我想叫救命，我依家無時間病，唔好咁樣攞我命！

好彩聽日Day Off，可以再休息一下。星期四是另一個世界...唉...真哀哉！