忙忙忙...新學期快開始啦

今日中午返左POLY U，成個星期無返去，今日周圍都好多人呀！特別係恆生銀行，個個都排隊交報名費！條人龍打蛇餅仲排到出門口，簡直嚇死人。好彩約左HENRY同我一齊去銀行，如果唔係0個半個鐘排隊就悶死我。

之後我地交換申請表互相檢查，點知我有幾處填錯左呀！激死我啦，唔知由幾時開始就好憎填呢d「水蛇春」咁長的申請表，好似查三代咁，煩死。不過最後都成功繳交總算鬆一口氣！阿Kit你要快手0的啦！

雖然下星期先開學，但我已經開始感覺到要上課的緊張氣氛。最近心血來潮，花左10小時整左一個7分鐘的MusicPhotoShare，以下就是320x240的版本.(睇完記得俾意見呀！)....稍後時間希望可以將清晰版上載給大家看啦！

鐵人耐力賽 - 終點 (二)

12月12日 至 12月21日


12月12日 (星期一) 考試週

今早回校中化補課又唔知醒，阿SIR改左地方連通告都無張淨係0係門口加告示，哎呀~~走來走去， 遲上加遲，入到課室已經過左半粒鐘，阿SIR仲整句「遲到好過無到」來閏我，真無耐。 U_U

中化補課完左之後就將昨天辛苦經營的兵馬俑交給阿SIR，慎防有意外。即使Numerical Skills的補課 遲左，我都在所不惜。等左一陣終於見到阿SIR，親手接過而且聽完他的評語之後就安心離去，不過 記得剛才中化補課在離開課室時走去問Dale和Emily攞番工具時，她們的態度非常不友善，不知道是 否因為昨天的事而憤怒呢？

在Numerical Skills補課期間突然手提響！原來係Dale打俾我，叫我立即上去搵阿Sir，我當時莫名奇妙 ，我話自己補課中，佢就叫我即刻上來，語氣帶命令成份。當然，我梗係補完之後先飛奔上去啦！

一去到門口就感到有一股殺氣迎面而來。原來Dale同Emily在阿Sir面前投訴我們三位男士臨時拆夥， 起她們飛腳，出賣她們。然後話我們三人合謀放棄整份習作，而且儲心積慮做自己的習作，以致我 們三人今日有模型有論文交，而她們沒有。

這番說話簡直含血噴人！砌詞猾辯、言之無物！我們三個都認為她們只是為了向老師求情希望可以延期而借我們過橋，而且她們還叫阿SIR向我們扣分以示懲罰，實質就是因為我和RICHARD都有模 型交，她們唔忿氣，不過「司馬昭之心，路人皆見」。事發後一小時我們三人再找老師理論，聽罷，老師都覺得她們小題大做。而最後的結果就當然無事啦！不過在今次呢件事上我明白到，何時何地原來都有些人為了自己可以上位或者自保而利用和犧牲別人。不過，連同學也是這樣子！我好傷心呀。 U_U

12月13日 (星期二) 考試週

留在家中寫論文！聽日交啦！成二千五百字，都唔知多定少！仲有好多書同資料未睇...死得

12月14日 (星期三) 考試週

辛辛苦苦地唔睡覺終於寫完，我寫到凌晨六時左右，共計3000字。原來2500字太少，看來我仍要下苦功學習長話短說。我的題目是「世貿會議年底在香港舉行。有人認為，自由貿易是經濟剝削。只要資本主義存在，貿易不可能公平。你同意嗎？」。一篇不容易的論文，但寫的時候感觸良多。提到自由與剝削的關係就會想到資本主義所造的階級主義和貧富懸殊，難度這個世界真係要犧牲一班人的利益而令社會進步嗎？

再細心回顧南韓農民在港表達的聲音、他們的訴求？香港是資本主義下受益的一群嗎？其實我們應該體諒和了解他們。

12月15日 (星期四) 考試週

留在家中溫書，因為明天考Human Behaviour & Social Envirnoment。有空的時候上左討論區，看到留言板反對農民的一方，他們的立場和留言簡直是目光短淺，見識淺薄。想法偏激而且亳無廣闊的胸襟。真係覺得部份的香港人自私自利，對世界大事亳不關心。

12月16日 (星期五) 考試日

今次的考試不過不失，用中文作答！不過做唔切，無左半題呀！唉~~有一題寫左四版紙呀，寫多左。回家之後在留言板上舌戰！

12月17日 (星期六) 考試週

昨天考完明天又有一科要考啦！想休息一下都唔得，聽日考Numerical Skills，今日大把公式要背......背到我傻左！

12月18日 (星期日) 考試日

今日一早就回校考試！結果就係做唔切呀！不過做唔切就證明左一樣野，題目我識做！哈哈...我估今次都唔駛再重讀。不過三小時的考試時間，在收卷前我左右兩方的學生都好早就走！俾我好大壓力呀！

12月19日 (星期一) 考試週

除在家中溫習外並無什麼特別。

12月20日 (星期二) 考試週

聽日要交Understanding Human Service Profession的論文！今次寫到癲左，用左足足八小時先寫完，真係慘！

12月21日 (星期三) 考試週

篇論文寫到今日八點先完成！之後瞓到十一點半俾Tiffany的來電叫醒左，先記起呢份論文要在中午十二點前send俾阿SIR。今次真係好彩有Tiffany叫我，如果唔係就一定遲到....最後就係11:59分SEND左俾阿Sir。勉強過關！

鐵人耐力賽 - 終點 (一)

哈哈...哈哈...哈哈...哈哈...

你地唔好以為我傻左，其實我似家放緊sem break呀！差唔多成個月的悠長假期，真係好開心呀。除左第一個星期的必要社交活動(聖誕節+新年倒數) 之外，之後的時間可以多d留係屋企，除左陪下屋企人之外，又係我煲電腦打機的時間！呵呵...我已經玩到不知時日啦......唔知今日幾號，依家幾點。只係知我已經有三日晚晚打到朝早六點先上床呀......真係爽.......^^

講起上來，我的日記差唔多要變成週記甚至月記啦！原來自己有成個月無寫到日記。不過就請你地原諒我啦！因為本人仲未培養成一種日日寫的習慣。睇來論更新速度，非jolene莫屬....因為我有每日都上去睇睇的習慣。哈哈....原來睇人日記的習慣比自己寫容易培養。當然，我唔會比自己的記憶有成個月的空白，以下我將會簡述自己05年12月的生活要事。


12月1日 至 12月11日


12月1日 (星期四)

我要交Numerical Skills的功課呀！都唔明點解臨考試都仲有咁多野做。

12月2日 (星期五)

放學後去左HAPPY屋企幫佢整電腦，煩死我啦！解決左當前問題之後已經唔早，仲要我幫佢重裝個作業系統~~佢既個人資料有20GB呀！5隻DVD都放不下.....結果在無燒碟機的情況下全部入晒我手提電腦。結果搞到凌晨1點先走得...在觀塘無地鐵坐結果等巴士出番北角。之後我自己在13度的寒溫下，用左個半鐘行路番屋企。唉~~~無計啦，當時馬路連架車都無，再等巴士就會寒死街頭 >_<

12月3日 (星期六)

參加社會服務團的送暖大行動......不過結果是自己唔知醒在屋企溫暖的被窩中渡過。

12月4日 (星期日)

返左學校同Alex, Dale, Emily, Richard一齊做0個份未完成的志蓮靜苑模型。唉~~都唔知做唔做得切，好似眼高手低口咁，做得太慢啦！之後上左阿爺屋企食飯..

12月5日 (星期一)

放學後再去HAPPY屋企幫佢整電腦，由下午六點整到十二點，今次終於完成啦！然後同佢同一班朋友四個人落左酒吧....弊家伙，佢醉左！(唔好以為我酒量好，其實我都無飲到酒，不過一支橙汁索價六十大元就嚇壞我了！)唉~~~結果搞到我凌晨五點先返到屋企，聽日仲要返學....@*^&#x

12月6日 (星期二)

返10:30呀~~無記錯我應該係遲到！之後12:30放學然後上香港大學睇醫生。天氣忽冷忽熱，哮喘發作呀！不過可能同自己近排夜夜唔瞓，係街頭被寒風冷壞有關。

12月7日 (星期三)

除上課外並無什麼特別。

12月8日 (星期四)

除上課外並無什麼特別。不過聽日有Numerical Skills的第二次Test，所以由夜晚十一點起開始溫書，至到凌晨一點不支倒床，睡著了！

12月9日 (星期五)

番下午的我在早上已經起床溫習。溫習大概用了四至五小時便回校上課，晚上測驗。豈又此理，今次測驗的題目簡直難到嚇死人、即使OPEN-BOOK TEST都無用....收卷後問阿SIR先知原來上一次測驗合格率太高，行政部門認為題目太淺，故此今次要出較難的題目。

*恍然大悟* 原來專上學院的教學政策是少合格多肥佬，製造失敗學生！我今次的成績是 1x/50

12月10日 (星期六)

今日要交中化報告呀！下午先回校繼續上星期的未完成模型。今日一定趕唔切啦！我買完材料之後返到學校，先發覺我地未完成的模型原來鎖在老師的房內，而老師傳呼機無跟身，手提電話無開！諗住完成其他小組件的上色工作，點知放小組件和設計圖的儲物櫃(DALE的儲物櫃)鎖匙她居然無帶！唉~~今次兇多吉少。簡單講句，就是出師未捷身先死。

之後，唯有用我今天買的材料，用記憶中的設計圖，儘量做。不過，Emily遲來，Richard缺席，今次呢個模型可能胎死腹中。我仲發覺Alex同Dale好似意見不和而鬧翻。

12月11日 (星期日)

原訂下午回校做模型的計劃，被中午的一道來電改變了。Richard在來電中建議拆夥，希望在有限的時間可以各自完成一份簡單的習作繳交。始終以現在的進度來說，實在不能花太多時間在模型上而忽略數日後的大考。我當時雖然同意，但並不是完全放棄現有的工作。故此，我叫RICHARD問ALEX的意見然後再向DALE同EMILY反映。過了不久就收到訊息她們二人同意拆夥，而志蓮靜苑歸她們，我們則自己各做一份新的習作或者論文。

之後，我便回想起上次與Kit的對話，當時我建議她做兵馬俑，結果我便以此為自己的習作。下午三時出去買材料，回家後開始自己做。起初以為自己做不到，不過冷靜過後，自己仔細的畫圖則，看資料，用紙黏土搓人形，再上色。想不到自己可以八小時內完成。